ភ្នំពេញ៖ អតីតនាយករដ្ឋមន្ត្រី និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្ដេចតេជោ ហ៊ុន សែន បានផ្ញើសារទៅក្រុមប្រឆាំងឱ្យពិចារណារឿងអាយុរបស់មនុស្សម្នាក់ដែលសម្ដេចធ្លាប់ប្រើឱ្យជួយកែរដ្ឋធម្មនុញ្ញនៅឆ្នាំ២០០៦ ដែលទំនងជាសំដៅទៅលោក សម រង្ស៊ី ខណៈបុរសម្នាក់នេះអាយុ ៧៤ឆ្នាំ ហើយបងសម្ដេចតេជោ ៣ឆ្នាំ។
សម្ដេចតេជោ បានសរសេរនៅបណ្ដាញទំនាក់ទំនងសង្គមរបស់សម្ដេចនៅល្ងាចថ្ងៃសុក្រ ទី១៩ ខែមករា ឆ្នាំ២០២៤ នេះថាជារឿងដែលអស់សំណើចមួយដែលលោក សម រង្ស៊ី រំពឹងឱកាសដឹកនាំប្រទេសបន្ទាប់ពីអស់ពីសម្ដេចតេជោ។
សម្ដេចតេជោបានលើកឡើងថាសមត្ថភាពដឹកនាំរដ្ឋរបស់លោក ហ៊ុន ម៉ាណែត ប្រជាជនកម្ពុជាអាចមើលដឹងហើយខណៈ សម រង្ស៊ី បាននិយាយជាន់កែងខ្លួនឯងទាំងមិនដឹងថាខ្លួនឯងអាយុលើសសម្ដេចនោះ។
សម្ដេចថា៖ «តែខ្ញុំចង់សួរទៅជនដែលតែងនិយាយ ជាន់កែងខ្លួនឯងនេះនូវសំនួរពីរដូចខាងក្រោម៖ ១. អំណាច ហ៊ុន ម៉ាណែត ផ្អែកលើអំណាចរបស់ ហ៊ុន សែន បើ ហ៊ុន សែន ស្លាប់ ហ៊ុន ម៉ាណែត នឹងចប់។ សំនួរសួរថា ចុះបើ ហ៊ុន សែន នៅរស់ ២០ ទៅ ៣០ឆ្នាំទៀត តើក្រុមប្រឆាំងវាទៅជ្រកនៅទីណា? ២. អ្នកដែលនិយាយថា ហ៊ុន សែន មិនមែនមានជីវិតអមតៈទេ ម្នាក់នេះមានអាយុច្រើនជាង ហ៊ុន សែន។ សំនួរសួរថា ពេល ហ៊ុន សែន កើនអាយុ តើលោកមិនកើនអាយុទេអី? ឆ្លើយជួសទៅចុះកើនដូចគ្នានឹងអាចងាប់មុន ហ៊ុន សែន»៕
